Meginviðfangsefnin eru upprifjun á talnareikningi og lagður er grunnur að góðum og skipulögðum vinnubrögðum í stærðfræði og nákvæmni í framsetningu. Tvö meginmarkmið áfangans eru annars vegar að láta nemendur kynnast og skilja íslenskt orðfæri greinarinnar og hins vegar að byggja upp þekkingu og vinnulag og víkka sjóndeildarhring þeirra. Nemendur þurfa að öðlast sjálfstraust til að beita stærðfræði af öryggi í daglegu lífi því að góð stærðfræðikunnátta er mikilvægur þáttur í almennri lífsleikni.
Nemandi skal hafa öðlast þekkingu og skilning á:
talnamengjum, talnameðferð, almennum brotum og tugabrotum, frumtölum og deilanleika.
prósentu-, hlutfalla- og vaxtareikningi.
undirstöðureglum talna- og bókstafareiknings og 1. stigs jöfnum með einni óþekktri stærð, forgangsröð aðgerða og heiltöluveldi.
flatarmáli og rúmmáli algengra forma.
jöfnu beinnar línu og hnitarúmfræði í tvívíðum fleti.
framsetningu gagna á myndrænu formi.
Nemandi skal hafa öðlast leikni í að:
beita helstu aðgerðum á heilar tölur og nota víxlreglu, tengireglu og dreifireglu í talnareikningi.
breyta milli tugabrota og almennra brot og þekkja deilanleika með lágum tölum.
beita veldareglum.
setja fram svör með viðeigandi nákvæmni.
reikna prósentur, finna hlutföll milli stærða og reikna vexti.
forgangsraða aðgerðum, nota sviga og heiltöluveldi í algebru og leysa jöfnur með einni óþekktri stærð.
beita formúlum og jöfnum við að reikna rúmmál.
vinna með jöfnu beinnar línu, finna hallatölu og skurðpunkta við ása hnitakerfis.
setja fram tölfræðileg gögn með myndrænum hætti og túlka myndræna framsetningu gagna á myndrænan hátt.
tjá sig munnlega og skriflega á stærðfræðilegan hátt.
Nemandi skal geta hagnýtt þá almennu þekkingu og leikni sem hann hefur aflað sér til að:
skrá lausnir sínar skipulega, skiptast á skoðunum við aðra um þær og útskýra hugmyndir sínar og verk skilmerkilega á viðeigandi hátt.
átta sig á tengslum ólíkra aðferða við framsetningu stærðfræðilegra hugmynda og viðfangsefna.
skilja merkingu og tengsl hugtaka í námsefninu og vinna með þau.
geta fylgt og skilið röksemdir og röksamhengi í mæltu máli og texta.
beita skipulegum aðferðum við að leysa úr viðfangsefnum og þrautum, s. s. út frá þekkingu á lausnum svipaðra þrauta, unnið til baka frá þekktum stærðum eða með því að setja upp jöfnur.
takast á við stærðfræðileg verkefni með opnum og jákvæðum huga.
Áfanginn er símatsáfangi. Matsþættir eru lagðir fyrir yfir önnina samkvæmt kennsluáætlun.