Í áfanganum lesa nemendur og hlusta á margvíslega texta, auk þess að horfa á myndbönd og leysa verkefni tengd þeim. Þeir hlusta m.a. á og lesa texta um ungt fólk sem er að stíga sín fyrstu skref í heimi hinna fullorðnu og daglegar athafnir þess, texta um íslenskt samfélag, svo og texta um almenningsvísindi. Þeir taka þátt í samtölum sem reyna á getu þeirra til að færa rök fyrir máli sínu. Lögð er áhersla á að nemendur séu virkir í að spyrja um merkingu texta og orða, og beri þannig aukna ábyrgð á tileinkun tungumálsins. Tilteknir textar eru lesnir ítarlega og aðrir yfirborðslega, því hvort tveggja er nauðsynlegt að kunna þegar nýtt tungumál er lært.
Þrjár annir í íslensku sem annað mál við Tækniskólann eða annað sambærilegt nám.
Nemandi skal hafa öðlast þekkingu og skilning á:
orðaforða sem tengist daglegu lífi á Íslandi.
orðaforða sem tengist ólíkum þáttum íslensks samfélags.
mæltu máli á íslensku á þeim hraða sem tíðkast meðal Íslendinga.
yfirborðslestri almannavísindatexta.
áhorfi og hlustun á efni um íslenskt samfélag.
Nemandi skal hafa öðlast leikni í að:
lesa og hlusta á íslenska texta um daglegt líf á Íslandi.
lesa og hlusta á texta um íslenskt samfélag.
færa rök fyrir máli sínu.
lesa og hlusta á almannavísindatexta.
hlusta og/eða horfa á útvarps- og/eða sjónvarpsefni.
Nemandi skal geta hagnýtt þá almennu þekkingu og leikni sem hann hefur aflað sér til að:
svara spurningum, munnlega og skriflega, úr ýtarlega lesnum textum.
greina frá meginefni allflókinna texta (yfirborðslestur).
skrifa stuttar ritgerðir um innihald íslenskra sjónvarpsþátta.
taka þátt í rökræðum um snúin viðfangsefni.
gera grein fyrir ýmsum þáttum íslensks samfélags sem kynntir eru í textanum.
taka þátt í samtölum við innfædda málnotendur um hin ýmsu málefni.
leggja stund á nám ætlað íslenskum nemendum á framhaldsskólastigi.
Áfanginn er símatsáfangi. Matsþættir eru lagðir fyrir yfir önnina samkvæmt kennsluáætlun.