Í áfanganum kynnast nemendur trúðatækni og samfélagsleikhúsi. Í fyrri hluta áfangans finna þau sinn eigin trúð og leika trúðasýningu fyrir leik- og grunnskólanema í nærliggjandi skólum. Nemendur fá þannig tækifæri til að æfa sig í að sýna fyrir áhorfendur og leik- og grunnskólanemar fá tækifæri til að „æfa“ sig í að fara í leikhús. Í seinni hluta áfangans öðlast nemendur þekkingu og skilning á samfélagsleikhúsi. Hugtakið felur í sér að búa til listræna ferla með fólki út í samfélaginu þar sem tekist er á við hversdagslega hluti. Nemendur vinna með eldri borgurum í Garðabæ að sýningu þar sem kannað verður hvað þessir tveir hópar eiga sameiginlegt. Yfirskrift sýningarinnar er „Hvað eigum við sameiginlegt?“.
Mikil áhersla er lögð á að tengja nám nemenda út í samfélagið og opna augu þeirra fyrir því að leiklist þarf ekki að vera bundin við „Black box“ leikhúsið með ljósum og leikmyndum. Vinnan gengur út á valdeflingu, bæði nemenda í áfanganum og þeirra sem þau vinna með út í samfélaginu.
LEIK2SL05
Nemandi skal hafa öðlast þekkingu og skilning á:
tækni trúðsins
fræðilegum og sögulegum þáttum trúðaleiks
samfélagsleikhúsi/hagnýtri leiklist
fræðilegum og sögulegum þætti samfélagsleikhúss
hvernig hægt er að gera leiklist aðgengilega út í samfélaginu
hvernig hægt er að vinna með leiklist inn á stofnunum
hugtakinu valdefling
Nemandi skal hafa öðlast leikni í að:
vinna stutta leiksýningu út frá tækni trúðsins
leika fyrir börn
vinna samfélagslegt leikhús inn á stofnun eins og elliheimili
fjalla um og greina samfélagið í gegnum leiklist
vinna að því að skapa leiksýningu með leikhópi
sýna leiksýningu í ólíkum rýmum
Nemandi skal geta hagnýtt þá almennu þekkingu og leikni sem hann hefur aflað sér til að:
vinna að leiksýningu sem byggir á tækni trúðsins
tengja leiklist inn í samfélagið
vinna að samfélagsleikhúsi með ólíkum samfélagshópum