Þessi áfangi býður nemendum upp á að skapa myndverk og skúlptúra úr endurnýjanlegum efnum sem annars fara í ruslið. Efni eins og pappír, pappi, plast, ál, gler og umbúðir er hægt að nota til að skapa falleg listaverk, hvort sem þau eru tvívíð eða þrívíð. Nemendur munu vinna verkefni út frá eigin hugmyndum og eins í tengslum við hinar og þessar stefnur í listasögunni. Reynt verður að tengja viðfangsefni nemenda og verkefni við neysluvenjur fólks og afleiðingar hennar. Eins verður unnið út frá sjálfbærni og hvernig hún getur hjálpað umhverfinu í átt til betri vegar. Tímarnir eru frjálslegir og bjóða upp á afslappað andrúmsloft. Lögð verður áhersla á skapandi, vönduð og sjálfstæð vinnubrögð.
MYNL1GT03
Nemandi skal hafa öðlast þekkingu og skilning á:
náttúrunni og nánasta umhverfi og sýna því virðingu
formum, línum og hreyfingum innan listsköpunar
gildi lita og notkun þeirra í umhverfi okkar
ferli frá hugmynd að fullunnu verki
aðferðum við listsköpun úr efnum sem skaða ekki umhverfið
sjálfbærni og endurnýjun efna
mikilvægi þess að sýna öguð og vönduð vinnubrögð
umhverfismennt og endurnýjun efna
Nemandi skal hafa öðlast leikni í að:
notkun hugmyndabókar og skráningu hugmynda
sjálfstæðum vinnubrögðum og vandvirkni í verkefnavinnu
að vinna með endurnýjun efna úr nánasta umhverfi í listsköpun
að skipuleggja eigið vinnuferli og gera uppdrætti/skissur að verkefni
Nemandi skal geta hagnýtt þá almennu þekkingu og leikni sem hann hefur aflað sér til að:
nýta hæfni sína í listræna vinnu og sköpun
sýna frumkvæði að verkefnum og verkefnavali
beita gagnrýnni hugsun við að meta sín eigin verk og annarra
geta unnið á persónulegan hátt með eigin hugmyndir og útfært þær yfir í listsköpun
geta opnað augun fyrir hinum hversdagslegu efnum og hlutum í nánasta umhverfi og nýtt þá í listsköpun
vinna með efni úr nánasta umhverfi
vera virkur í umræðum um umhverfið og endurnýjun
vera sjálfbær og tileinka sér endurnýjanleg efni í listsköpun
Fjölbreytt verkefni verða metin jafnt og þétt yfir önnina. Áhersla verður lögð á munnlegar umsagnir frá kennara sem leiða nemandann áfram. Engin skrifleg lokapróf.