Nemendur fá heildaryfirsýn yfir skipulag vélarúms, m.a. vélastaðsetningar og lagnafyrirkomulag. Þeir öðlast með hjálp fjölbreyttra gagna djúpa þekkingu á uppbyggingu einstakra vélarhluta og hlutverki þeirra. Stefnt er að því að nemendur geti metið ástand vélarhluta með mælingum og slitmörk út frá gögnum framleiðenda og öðrum upplýsingum. Í áfanganum er fjallað um ræsiloft og loft fyrir vinnuvélar og stýritæki, einstaka þætti loftkerfa, afgaskerfi, skólp- og sorakerfi, sjókerfi og ferskvatnskerfi til almennra nota. Fjallað er um legur, þ.m.t. hvítmálmslegur, uppbyggingu og gerð þeirra og notkunarsvið ásamt því að fjalla um krafta í bulluvélum, um sveiflumyndun í vélum og vélakerfum, um eigin tíðni véla, um gerð og hlutverk dempara og eftirlit með þeim, um byggingu meðalhraðgengra og hraðgengra dísilvéla og ýmis rekstraratriði varðandi svartolíubrennslu og gangtruflanir. Í verklegum þætti áfangans er áhersla lögð á keyrslu vélarúms ásamt ritmyndatöku og viðbrögð við gangtruflunum þjálfuð í vélarúmshermi. Fjallað er um skilvindur, viðhald þeirra og rekstur, þrýstivökvakerfi og vökvagíra, svo og Pt-eldsneytiskerfi og afgasvaka. Nemendur gera áætlun um viðgerðir og leggja mat á ástand búnaðarins að viðgerð lokinni.
Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautarlýsingunni.
VÉLS3VB04DV
Nemandi skal hafa öðlast þekkingu og skilning á:
uppbyggingu ræsiloftskerfis og öllum hlutum þess, þar á meðal tveggja þrepa loftþjöppu, ræsilofthylki með lokum og öðrum búnaði sem tilheyrir slíku kerfi.
mismunandi loftræsibúnaði dísilvéla.
uppbyggingu afgaskerfis.
uppbyggingu skólp- og sorakerfis.
helstu gerðum lega, uppbyggingu þeirra og notkunarsviði.
innri sveiflum í vélum og vélakerfum, eigintíðni véla og hvernig megi draga úr óæskilegum sveiflum.
hlutverki dempara, helstu gerðum þeirra og eftirliti með ástandi þeirra.
uppbyggingu loftræstikerfis.
mismunandi gerðum lega til mismunandi nota.
aðferðum varðandi þurrkun lofts fyrir stýrikerfi og loftræstikerfi fyrir vélarúm og lestar.
mismunandi gerðum afgaskatla og öryggisbúnaði sem tengist þeim.
mismunandi tegundum eldsneytisolíu og smurolíu, eiginleikum þeirra og annmörkum.
Nemandi skal hafa öðlast leikni í að:
útskýra fyrirkomulagsteikningar í vélarúmi og rörateikningar mismunandi kerfa.
rekja og lýsa fráveitukerfum í skipum, þ.e. skólpkerfum og lögnum, og kerfum til söfnunar, geymslu og losunar á sora og austri.
Nemandi skal geta hagnýtt þá almennu þekkingu og leikni sem hann hefur aflað sér til að:
stjórna vélbúnaði og vélakerfum í stærri skipum.
gera tillögur um val á vélbúnaði og íhlutum sem best henta við tilteknar aðstæður, t.d. með tilliti til álags, snúningshraða og endingar.
gera tillögur um viðhald og leggja mat á árangur af viðgerðum.
Lögð er áhersla á fjölbreytt námsmat með leiðsögn. Námsmatið er í höndum kennara viðkomandi áfanga en þarf að fylgja þeim reglum sem kveðið er á um í skólanámskrá.