Í áfanganum eru kennd grunnatriði trésmíða með áherslu á þekkingu og færni í trésamsetningum, límingum, pússningu og yfirborðsmeðferð. Haldið er áfram umfjöllun um efnisfræði tréiðna þar sem ítarlegar er farið í ýmsa eðliseiginleika viðar, flokkun, merkingar og þurrkun. Nemendur kynnast notkun algengra tegunda viðarlíms og yfirborðsefna, vinnubrögðum og öryggisþáttum. Kennslan byggist að hluta á fyrirlestrum þar sem kennari útskýrir grunnatriði fyrir nemendum en stærsti hlutinn eru fjölbreytileg smíðaverkefni. Í áfanganum læra nemendur grunnatriði í véltrésmíði. Fjallað er um algengustu trésmíðavélar, meðferð þeirra, viðhald og notkun. Lögð er áhersla á notkunarleiðbeiningar og merkingar á tækjum og búnaði. Kennsla í áfanganum byggir á innlögnum frá kennara þar sem hann útskýrir grunnatriði fyrir nemendum með sérstakri áherslu á öryggisþætti en að öðru leyti er aðaláherslan á verkefni þar sem nemendur fá þjálfun í notkun véla og tækja. Mikilvægt er að nemendur læri ábyrgð í umgengni við trésmíðavélar og að takast ekki á við vélavinnu án fullnægjandi undirbúnings, hjálpar‐ og öryggisbúnaðar.
TRÉS1SA06AB
Nemandi skal hafa öðlast þekkingu og skilning á:
vinnuaðstöðu og vinnumhverfi.
umgengni, ábyrgð, notkun og viðhaldi á algengustu trésmíðavélum.
öryggisþáttum og viðhaldi trésmíðavéla.
vinnuaðstöðu og vinnumhverfi tiltekinna trésmíðavéla.
smíðisfestingum sem notaðar eru í trésmíði.
einstökum samsetningum og notkunarsviði þeirra.
grunnatriðum í yfirborðsmeðferð smíðaviðar og plötuefnis.
helstu yfirborðsefnum á tré og notkunarsviðum þeirra.
algengustu slysavöldum og slysum í véltrésmíði og afleiðingum þeirra.
öryggisreglum og öryggisbúnaði sem notaður er í véltrésmíði.
Nemandi skal hafa öðlast leikni í að:
nota áhöld til mælinga og uppmerkinga.
nota mismunandi tegundir verkfæra, véla og efna.
nota helstu trésamsetningar við einfalda trésmíði.
lesa merkingar og flokka efni með tillit til útlits og styrks.
nota mismunandi tegundir verkfæra, véla og efna á byggingarstað og verkstæðum.
skipta um helstu skurðarverkfæri undir eftirliti.
smíða einfalda hluti í trésmíðavélum undir eftirliti.
beita algengustu stillingum og nota aukabúnað.
Nemandi skal geta hagnýtt þá almennu þekkingu og leikni sem hann hefur aflað sér til að:
aðlaga sig að mismunandi vinnuumhverfi.
velja smíðavið fyrir einstök verkefni og rökstyðja valið.
viðhalda og yfirfara ástand öryggisþátta trésmíðavéla.
undirbúa og framkvæma verk fyrir yfirborðsmeðferð og beita öryggisreglum.
smíða einfalda nytjahluti eftir teikningum og verklýsingum.
beita vinnuskipulagi í trésmíði og fylgja aðgerðalista við vinnu.
efna niður og vinna tré í höndum fyrir endanlega samsetningu.
meta gæði smíðishluta fyrir samsetningu.
velja trésmíðavélar með hliðsjón af verkefni og annast viðhald þeirra.
athuga rétta virkni og nota öryggisbúnað fyrir gangsetningu véla.
nota rétta staðsetningu og líkamsbeitingu við vélavinnu.