Nemendum er leiðbeint í matreiðslu þar sem áhersla er lögð á nútímalegan en umfram allt hollan og bragðgóðan mat. Ennfremur er nemendum kennt að gera gamlan og góðan heimilismat. Nemendur fara út í náttúruna og tína ber og sveppi og læra þannig að nýta það sem landið hefur upp á að bjóða í matargerð. Lögð er áhersla á að kenna nemendum góða umgengni í eldhúsi, notkun og frágang tækja og áhalda, hreinlæti við matargerð og hvernig á að ganga frá að loknu starfi. Fjallað er um algengustu hráefni sem notuð eru til matreiðslu og farið í allar helstu matreiðsluaðferðir. Fjallað er um áhrif matreiðslu á næringargildi og æskilega uppbyggingu máltíða. Í áfanganum er einnig farið í þrif íbúðar, ræstingar og umgengni og nemendum er kennt hvernig á að skipuleggja innkaup með hagsýni að leiðarljósi.
Nemandi skal hafa öðlast þekkingu og skilning á:
hvernig á að hirða um áhöld og tæki sem notuð eru í eldhúsum.
mikilvægi skipulags við eldhússtörf.
mismunandi matreiðsluaðferðum.
mikilvægi fjölbreyttrar fæðu og hvernig á að matreiða hana.
hvernig á að meðhöndla og geyma hráefni til matargerðar til að koma í veg fyrir matarsýkingar.
hvernig á að áætla skammtastærðir.
reglum um vörumerkingar matvæla.
mikilvægi þrifa í heimahúsum og aðferðum við þrif og þvott.
mikilvægi þess að vera hagsýnn og skipulagður við innkaup.
Nemandi skal hafa öðlast leikni í að:
hirða um áhöld og tæki sem notuð eru í eldhúsum.
undirbúa og skipuleggja starfið í eldhúsinu.
matreiða undirstöðurétti í öllum fæðuflokkum með mismunandi matreiðsluaðferðum.
matreiða hollan mat.
áætla skammtastærðir fyrir ólíka hópa.
gæta hreinlætis við matargerð.
lesa næringar- og innihaldslýsingar matvæla.
sjá um þrif í heimahúsum.
vera hagsýnn og skipulagður í innkaupum.
Nemandi skal geta hagnýtt þá almennu þekkingu og leikni sem hann hefur aflað sér til að:
vinna við eldhússtörf og ganga rétt um áhöld og tæki sem meta má með leiðsagnarmati og verklegum æfingum.
matreiða fjölbreyttan og hollan mat úr mismunandi hráefni sem meta má með leiðsagnarmati og verklegum æfingum.
matreiða fyrir mismunandi hópa fólks sem meta má með leiðsagnarmati og verklegum æfingum.
meðhöndla og geyma hráefni og afganga með réttum hætti sem meta má með verkefnum og verklegum æfingum.
velja heilsusamlegar eða æskilegar matvörur út frá innihalds- og næringarefnalýsingum sem meta má með rökræðum og verkefnum.
þrífa og skipuleggja þrif í heimahúsum sem meta má með leiðsagnarmati og verklegum æfingum.
skipuleggja innkaup með hagsýnum hætti sem meta má með verkefnum.
Námsmatið byggir á þátttöku í eldhússtörfum og matreiðslu. Mikið er lagt upp úr leiðsagnarmati í þessum verklega áfanga þar sem kennari leiðbeinir nemendum jafnóðum um það sem þeir gera vel og það sem betur mætti fara. Námsmat er einnig í formi umræðna og rökræðna milli nemenda og kennara auk þess sem nemendur vinna skrifleg verkefni.