Í áfanganum er fjallað um atferli og hugsanir auk þess sem viðhorf eru skoðuð í félagslegu samhengi og með tilliti til persónuleikakenninga. Meðal efnisþátta eru skematísk vitneskjuvinnsla, staðalmyndir, fordómar, breyting á fordómum, minni, athuganir á viðhorfum, aðlögun og ást, hópar, hópstarf, samskipti og tjáning, réttarsálfræði, umhverfissálfræði, markhópur, miðlar, persónuleiki, sálfræðileg próf og viðhorfs- og skoðanakannanir. Áhersla er lögð á að nemandi geti tekið sjálfstæða, vel rökstudda afstöðu til álitamála varðandi félagssálfræði.
SÁLF2HA05
Nemandi skal hafa öðlast þekkingu og skilning á:
ólíkum sviðum innan félagssálfræðinnar.
fordómum og rannsóknum á þeim.
viðhorfum og tengslum þeirra við hegðun.
ólíkum skilgreiningum á persónuleika.
því hvers vegna fólki líkar misjafnlega vel hverju við annað.
áhrifum hópa, hópþrýstingi og höfnun innan hópa.
rannsóknum á hlýðni manna við hversdagslegar og óvenjulegar aðstæður og þeim þáttum sem hafa áhrif á hana.
áhrifum samskipta á vinnuanda og starfsánægju.
Nemandi skal hafa öðlast leikni í að:
átta sig á og skilgreina eigin fordóma og annarra.
greina viðhorf.
greina þætti sem hafa áhrif á við hverja fólki líkar og hverja ekki.
vinna með ólíka áhrifaþætti í hópavinnu.
lesa í hegðun fólks við ýmsar aðstæður.
greina samskipti í eigin vinnuumhverfi og áhrif þeirra á starfsánægju.
Nemandi skal geta hagnýtt þá almennu þekkingu og leikni sem hann hefur aflað sér til að:
beita vinnubrögðum sem eru viðurkennd í fræðigreininni og byggjast á kenningum sem metið er með verkefnavinnu.
vinna faglega gegn eigin fordómum sem metið er með sjálfsmati og umræðum.
skilgreina og hafa áhrif á viðhorf sem metið er með verkefni sem byggir á stuttri athugun á vettvangi.
bregðast við ólíkum eiginleikum og framkomu fólks á faglegan hátt sem metið er með verkefnum, leiðsagnarmati og sjálfsmati.
nýta hópavinnu á jákvæðan og uppbyggilegan hátt í starfi sínu sem metið er með sjálfsmati.
bregðast faglega við óvæntri hegðun og sýna viðbrögðum fólks sem lendir í erfiðum og óvæntum aðstæðum skilning sem metið er með umræðum og jafningjamati.
leggja sitt af mörkum til að auka starfsánægju sem metið er með verkefni og kynningu.
hjálpa náunga sínum sem í nauðum er staddur og hafi við það hliðsjón af því að afskiptaleysi við slíkar aðstæður er óásættanlegt sem metið er með verkefni og umræðum.
Kennslan er í formi fyrirlestra, verkefnavinnu, og umræðna. Í áfanganum verður stuðst við fjölbreyttar námsmatsaðferðir og áhersla lögð á leiðsagnarmat. Nemendur vinna ýmiss konar verkefni sem metin verða, s.s. einstaklingsverkefni, hópverkefni, umræðuverkefni og netverkefni. Þeir taka einnig þátt í verklegum æfingum ásamt því að taka hlutapróf. Mikill tími fer í umræður þar sem álitamál innan félagssálfræðinnar eru rædd. Sum verkefni þurfa nemendur að kynna fyrir samnemendum sínum.