Í áfanganum eru tölvuleikir skoðaðir í sem víðustu samhengi. Markmiðið er að kynna nemendum fjölbreytt landslag tölvuleikja og veita þeim innsýn í heim tölvuleikja - meðal annars sem áhugamál, list, iðnað og fræðigrein. Samfélagsleg og menningarleg áhrif tölvuleikja eru til umfjöllunar ásamt því að valdir kaflar úr sögu tölvuleikja eru teknir fyrir. Nemendur fá að kynnast því hvernig tölvuleikir eru búnir til og búa til sína eigin tölvuleikjagrafík og setja saman prótótýpu af tölvuleik.
Nemandi skal hafa öðlast þekkingu og skilning á:
tengslum tölvuleikja við menningu okkar og samfélag
uppbyggingu og samsetningu tölvuleikja
áhrifum tölvuleikja í víðum samhengi
náms- og atvinnumöguleikum innan greinarinnar
þróun og sögu tölvuleikja
Nemandi skal hafa öðlast leikni í að:
tengja tölvuleiki við ólík atvinnu- og fræðisvið
líta á tölvuleiki frá mismunandi sjónarhornum og í víðu samhengi
búa til einfalda frumgerð af leik
Nemandi skal geta hagnýtt þá almennu þekkingu og leikni sem hann hefur aflað sér til að:
tileinka sér efni/inntak margvíslegra texta og geta hagnýtt sér á mismunandi hátt og hugsa lausnamiðað
kynna hugmynd sína og rökstyðja gildi hennar
skipuleggja sjálfstæða vinnu og hópastarf
Í áfanganum er viðhaft leiðsagnarmat með símati alla önnina. Öll verkefni gilda til einkunnar og þess vegna er það mikilvægt að nemendur stundi námið reglulega.