Nemendur þjálfast í að vinna út frá grunnhugmynd að verkefni sem spannar heila önn og sýnir fram á þá heildarþekkingu, leikni og hæfni sem þeir hafa öðlast á námsferli sínum. Verkefnið verður unnið undir handleiðslu leiðbeinanda sem aðstoðar m.a. við að móta verkefnið og að skipuleggja verkframvinduna. Nemendur velja viðfangsefni tengt sérsviði sínu á alþjóðabraut, gera skriflega verkáætlun í upphafi annar ásamt því að ákveða skilaformið á verkefninu sjálfu. Lokaafurðin getur verið í formi ritgerðar, heimasíðu, hlaðvarps, myndbands, þýðingar, ferilmöppu eða á öðru því formi sem nemandi kýs í samráði við leiðbeinanda. Verkefnið getur verið að hluta til eða í heild á erlendu tungumáli, allt eftir eðli verkefnisins.
Lögð er áhersla á að nemendur nýti sér þá þekkingu sem þeir hafa öðlast í námi sínu; sýni fram á sjálfstæð og skapandi vinnubrögð, færni í heimildavinnu og hæfni til að skipuleggja og gera grein fyrir vinnuferli verkefnisins. Nemendur þurfa að geta komið þekkingu sinni á viðfangsefninu á framfæri á skýran hátt bæði munnlega og skriflega. Í lok annar fer fram kynning á verkefninu og ferlinu við vinnslu þess.
160 einingar af alþjóðabraut
Nemandi skal hafa öðlast þekkingu og skilning á:
helstu reglum um heimildanotkun og skráningu
helstu aðferðum við vinnslu langtímaverkefnis
helstu aðferðum við úrvinnslu og mat heimilda
hvaða verkfæri og framsetningu best er að velja út frá viðfangsefninu
helstu aðferðum við framsetningu langtímaverkefnis bæði munnlegra og skriflegra
Nemandi skal hafa öðlast leikni í að:
sýna frumkvæði, sjálfstæði og skapandi nálgun
vinna að verkefninu á sjálfstæðan máta og leggja mat á verkefnið og lokaafurðina
afla sér fjölbreyttra og fræðilegra heimilda um efnið
velja sér viðeigandi form fyrir lokaafurð verkefnisins
beita viðurkenndum aðferðum um meðferð og úrvinnslu heimilda
tjá sig á skýran og viðeigandi hátt um verkefnið bæði munnlega og skriflega
Nemandi skal geta hagnýtt þá almennu þekkingu og leikni sem hann hefur aflað sér til að:
meta áreiðanleika heimilda
sjá samhengi undanfarinnna anna og samspil mismunandi námsgreina
greina frá og leggja mat á eigin verkefni og lokaafurð
leggja fram lokaafurðina, kynna hana og ferlið við vinnslu hennar á aðgengilegan og skýran hátt bæði munnlega og skriflega
Um leiðsagnarmat verður að ræða. Horft verður til sjálfstæðra vinnubragða nemenda, málfars, efnistaka, frumleika, meðferðar heimilda við vinnslu verkefnisins og hæfni nemenda til að skipuleggja verkferlið og gera grein fyrir því. Lagt verður mat á munnlega kynningu í lok annar og lokaafurðina sjálfa.