Áfanginn er tvískiptur og hefst hann á umfjöllun um hestinn sjálfan en í seinni hlutanum verður einblínt á reiðmanninn. Í fyrri hluta áfangans verður farið m.a. yfir uppruna og sögu íslenska hestsins ásamt sögu reiðmennskunnar. Skoðaðir verða grunnþættir í atferli, eðli og hegðun, skapi og skynjun og skynfærum hesta. Nemendur læra hvernig leggja skuli mat á andlegt og líkamlegt ástand hesta og mikilvægi þess að tileinka sér rétt viðhorf gagnvart hestinum. Fjallað verður um helstu undirstöðuatriði varðandi fóðrun og umhirðu hesta, s.s. hófhirðu, feldhirðu og heilbrigði.
Í seinni hluta áfangans verður nemendum kennt helstu þjálfunarhugtök og skilgreiningar sem liggja þeim að baki. Farið verður yfir helstu þjálfunarstig klassískrar reiðmennsku og grunnatriði þjálfunar. Kennd verða undirstöðuatriði í hestamennsku, helstu ásetur, líkamsbeitingar og taumhald. Þar að auki eru kynnt fyrir nemendum helstu reiðtygi, notkun þeirra og umhirða. Lögð verður áhersla á knapann, líkamsbeitingu, jafnvægi, viðhorf og andlegan líðan.
INNÁ1IN05
Nemandi skal hafa öðlast þekkingu og skilning á:
sögu íslenska hestsins og sögu reiðmennskunnar
grunnþáttum í atferli, eðli og hefðun, skapi og skynjun og skynfærum hestsins
undirstöðuatriðum í fóðrun og umhirðu hesta
grunnatriðum í þjálfun hesta og líkamsbeitingar og andlegs viðhorfs knapa
Nemandi skal hafa öðlast leikni í að:
tjá sig á skýran, gagnrýninn og skapandi hátt um þá þekkingu sem þeir öðlast í áfanganum
sýna frumkvæði og sjálfstæði í vinnubrögðum við útfærslu sjálfstæðs lokaverkefnis
beita þeim þekkingaratriðum sem þeir öðlast í áfanganum á viðfangsefni tengd hestamennskunni
lesa og fjalla um sögu hestsins og atferli hans á gagnrýninn og fræðilegan hátt
flytja af öryggi vel byggðan fyrirlestur sem tengist hestamennsku eða reiðmennsku
Nemandi skal geta hagnýtt þá almennu þekkingu og leikni sem hann hefur aflað sér til að:
átta sig á mikilvægi andlegrar líðanar bæði hests og knapa
tjá rökstudda afstöðu og taka þátt í málefnalegri umræðu um reiðmennsku
sýna þroskaða siðferðisvitund, víðsýni, sköpunarhæfni og samlíðan í málflutningi sínum, umfjöllun og verkum
Í áfanganum er viðhaft leiðsagnarmat með símati alla önnina.