Í áfanganum verður farið í stórum dráttum yfir mannkynsöguna og hún skoðuð á þverfaglegan hátt. Sagnfræði, mannfræði, líffræði, umhverfisfræði, heimspeki og hagfræði hjálpast að við að kynna nemendum fyrir sögu mannsins sem dýrategundar sem hefur þróast og aðlagað sig að sífellt breyttu umhverfi í árþúsunda rás og gerir enn.
Auk þess að fá grófa heildarmynd af mannkynssögunni gefst nemendum kostur á að kafa dýpra í valin viðfangsefni sem tengjast þeirra eigin áhugasviðum.
Dæmi um lykilspurningar í áfanganum eru: Hvers vegna náði maðurinn svo stóru forskoti á aðrar dýrategundir? Er nútímafólk ánægðara og betur sett en forfeður þess? Eru líkur á því að í næstu framtíð verði til “manneskjur” sem eru svo ólíkar okkur að við getum ekki talist til sömu dýrategundar?
10 einingar á 2. þrepi í félags- / náttúruvísindum.
Nemandi skal hafa öðlast þekkingu og skilning á:
sögu mannsins í víðu samhengi
mismunandi sjónarhornum hinna ýmsu fræðigreina á mannkynssöguna
hvernig umhverfisbreytingar hafa mótað manninn, og hvernig maðurinn hefur mótað umhverfi sitt
hvernig hugmyndaheimur mannsins hefur breyst í aldanna rás
úrvinnslu gagna og uppsetningu efnis í ýmsu formi
Nemandi skal hafa öðlast leikni í að:
nýta mismunandi kenningar frá ýmsum greinum til að skoða mannkynsöguna
afmarka söguleg málefni, greina meginþætti og álitamál og leita eftir mismunandi sjónarhornum
nýta fræðilegan texta og myndefni til skilnings á fræðilegum hugmyndum og sjónarhornum
leita samhengis og tengsla milli tímabila, hugmynda, menninga, fræðasviða og umhverfisþátta
miðla skýrt og skilmerkilega fræðilegu efni á mismunandi vegu
Nemandi skal geta hagnýtt þá almennu þekkingu og leikni sem hann hefur aflað sér til að:
sjá sögu mannkyns í þverfaglegu samhengi
sjá þróun menningar og umhverfis í hnattrænu samhengi
beita gagnrýninni hugsun og viðurkenndum aðferðum við að koma skoðunum sínum, þekkingu og skilning á viðfangsefnum áfangans á framfæri á margvíslegan hátt
sýna frumkvæði og frumlega útfærslu í verkefnavinnu