Áfanginn er að mestu verklegur þar sem áhersla er lögð á þol og þolþjálfun. Í áfanganum verður fjallað um mikilvægi upphitunar fyrir hvers konar líkamlega þjálfun og farið er yfir muninn á loftháðri og loftfirrtri þolþjálfun. Nemendur læra um mismunandi þjálfunaraðferðir í þolþjálfun, hvernig hægt er að byggja upp og viðhalda þoli auk þess sem þeim verða kynntar mismunandi aðferðir til mælinga á þoli. Nemendur þurfa að taka þátt í skipulagðri þrekþjálfun hjá viðurkenndu íþróttafélagi eða sérhæfðum þjálfara að minnsta kosti þrisvar sinnum í viku.
Nemandi skal hafa öðlast þekkingu og skilning á:
mikilvægi góðrar upphitunar í allri þjálfun
mismunandi þjálfunaraðferðum í þolþjálfun
muninum á loftháðri og loftfirrtri þolþjálfun
helstu hugtökum sem tengjast þolþjálfun s.s. Hvíldarpúls, hámarkspúls og þjálfunarpúls
Nemandi skal hafa öðlast leikni í að:
setja upp upphitunaráætlun
setja upp æfingar og æfingaáætlun sem miðar að því að auka þol
finna eigin hvíldar- og hámarkspúls og reikna út æfingapúls
framkvæma próf til að meta þol
Nemandi skal geta hagnýtt þá almennu þekkingu og leikni sem hann hefur aflað sér til að:
fara eftir eigin upphitunaráætlun
fara eftir eigin þolþjálfunaráætlun
mæla, meta, bæta og viðhalda eigin þoli
Í áfanganum er viðhaft leiðsagnarmat með símati, nemendur þurfa að standast mætingarkröfur áfangans. Öll verkefni gilda til einkunnar.