Áfanginn er að mestu verklegur þar sem áhersla er lögð á samhæfingu, jafnvægi og liðleika. Í áfanganum er fjallað um mikilvægi og megináhrif liðleikaþjálfunar á líkamann og nemendum kynntar helstu aðferðir til að þjálfa liðleika. Þar að auki eru kenndar aðferðir til að mæla liðleika í mikilvægum liðum á einfaldan hátt. Þá er farið yfir mikilvægi þess að efla samhæfingu og jafnvægi og jafnframt fjallað um mikilvægi svefns, hvíldar og slökunar í nútímasamfélagi. Nemendur þurfa að taka þátt í skipulagðri þrekþjálfun hjá viðurkenndu íþróttafélagi eða sérhæfðum þjálfara að minnsta kosti þrisvar sinnum í viku.
Nemandi skal hafa öðlast þekkingu og skilning á:
Mikilvægi þess að þjálfa samhæfingu, jafnvægi og liðleika
Kyrrstöðu- og hreyfiliðleika
Mikilvægi svefns, hvíldar og slökunar
Nemandi skal hafa öðlast leikni í að:
Setja upp æfingaáætlun og þjálfa samhæfingu, jafnvægi og liðleika á markvissan hátt
Framkvæma próf til að meta liðleika
Útbúa æfingadagbók
Nemandi skal geta hagnýtt þá almennu þekkingu og leikni sem hann hefur aflað sér til að:
Styrkja sig bæði líkamlega og andlega
Nota slökunaræfingar til að draga úr líkum á streitu
Hlusta á eigin líkama og þarfir
Geta tekið þátt í umræðum um viðfangsefnin á faglegan og uppbyggilegan hátt
Í áfanganum er viðhaft leiðsagnarmat með símati alla önnina. Öll verkefni gilda til einkunnar. Nemendur þurfa að uppfylla skilyrði um mætingu og virkni í tímum. Áfanginn er metinn út frá verkefnaskilum, mætingu, virkni, færni, áhuga og sjálfstæði.