Í áfanganum er lögð áhersla á að nemandi læri um starfsemi mannslíkamans með áherslu á bein og vöðva. Sérstök áhersla verður lögð á þau líffæri og líffærakerfi sem tengjast hreyfingum mannslíkamans. Fjallað verður um bein, bönd og liðamót, liðfleti og liðpoka. Einnig verður fjallað um hreyfingu í liðamótum og stefnu hreyfinga. Fjallað verður um einstaka vöðva, upptök þeirra, festu og starf. Fjallað er um hugtök og grundvallaratriði hreyfifræðinnar og komið inn á tækni íþróttagreina. Áfanginn byggir að stórum hluta á starfrænni hreyfifræði, þ.e. hvernig vöðvar, bein og liðamót líkamans koma við sögu í fjölbreyttum hreyfingum. Enn fremur er fjallað um rétta lyftitækni, starfsstellingar og hreyfingar við vinnu. Einnig eru kenndar fyrirbyggjandi æfingar og mismunandi aðferðir við meðhöndlun íþróttameiðsla. Nemendur læra að bregðast við algengum íþróttameiðslum.
ÍÞRF2þj05
Nemandi skal hafa öðlast þekkingu og skilning á:
helstu vöðvum og vöðvahópum líkamans
beinum, böndum og liðamótum
hlutverki beinagrindar og hreyfingum helstu liðamóta
helstu lögmálum hreyfifræðinnar
réttri lyftitækni
helstu íþróttameiðslum
því hvernig best er að meðhöndla íþróttameiðsli
helstu formum endurhæfingar
Nemandi skal hafa öðlast leikni í að:
finna lýsandi æfingar fyrir þjálfun einstakra vöðva og vöðvahópa
útskýra hreyfingar líkamans með tilliti til lögmála hreyfifræðinnar
greina mismunandi álag á bein, bönd og liðamót
taka lögmál hreyfifræðinnar með sem forsendur þegar unnið er að gerð æfingaáætlunar
lyfta rétt og vera meðvitaður um réttar starfsstellingar
veita skyndihjálp við íþróttameiðslum
Nemandi skal geta hagnýtt þá almennu þekkingu og leikni sem hann hefur aflað sér til að:
starfa með börnum og unglingum við íþróttaiðkun út frá líffræðilegum forsendum
gera sér grein fyrir áhrifum mismunandi æfinga sem þarf að gera til að styrkja ákveðna líkamshluta
beita líkamanum á sem hagkvæmastan og áhrifaríkastan hátt
skilja viðbrögð og aðlögun líkamans við þjálfun
veita hjálp þegar iðkendur slasast við ástundun íþrótta
leiðbeina iðkendum við meðhöndlun helstu íþróttameiðsla
framkvæma og meta fyrirbyggjandi æfingar til að koma í veg fyrir íþróttameiðsli