Í þessum áfanga er lögð áhersla að nemendur læri að sjá verðmæti og notagildi í hráefni eins og gömlum fötum, töskum, sængurverum og fleiru. Nemendur læra einfaldar sniðbreytingar til að gera gamla flík að nýrri eða breyta henni í annan hlut.
Nemendur koma til með að nýta sér ýmis efni og gera tilraunir með ólík efni og finna leiðir til að nýta þau til þess að búa til m.a. flíkur, töskur og leikföng.
Áhersla verður lögð á að nemendur fylgi verkinu eftir frá hugmynd að fullunnu verki og temji sér vönduð vinnubrögð. Nemendur verða með A4 teikni bók þar sem þau setja inn vinnuáætlun og vinnulýsingar. Þá taka nemendur ljósmyndir af ferli vinnunnar og setja þær fram í hugmyndabók.
Nemandi skal hafa öðlast þekkingu og skilning á:
skapandi lausnaleit í gegnum tilraunavinnu
að endurnýting kemur í veg fyrir sóun og mengun efnislegra gæða
fjölbreytileika efna og aðferða til sköpunar
þjálfun í ýmsum tækniatriðum á saumavél
að sjá fleiri og opnari möguleika í vinnuferlinu
sjálfum sér, hugsun og verklagi.
Nemandi skal hafa öðlast leikni í að:
virkja hugmyndarflugið og þar með sköpunarkraftinn
meðhöndla rétt áhöld og vélar textílgreinarinnar
tileinka sér vönduð vinnubrögð
skilja fjölbreytileika efnisnotkunar og úrvinnslu.
Nemandi skal geta hagnýtt þá almennu þekkingu og leikni sem hann hefur aflað sér til að:
tileinka sér skapandi lausnarhugsun sem hann getur nýtt bæði í leik og starfi.
geta greint ný tækifæri í endurnýtingu á fatnaði.
geta notað fjölbreyttar aðferðir við að leysa viðfangsefni.
geta horft á sköpun, tísku og hönnun með opnum hug.
Leiðsagnarnám er viðhaft í hverjum tíma. Fjölbreytt verkefni eru metin jafnt og þétt yfir önnina og áhersla lögð á umsagnir sem leiða nemandann áfram. Sjálfsmat og jafningjamat þar sem nemendur fá tækifæri til að meta sín eigin verk og vinnu og einnig samnemenda sinna. Námsmat er nánar skilgreint í kennsluáætlun.