Áfanginn fjallar um kynheilbrigði í víðum skilningi. Sérstök áhersla er sett á kynheilbrigði unglinga en nemendur læra um kynferðisþroska frá fæðingu og út lífið. Til umfjöllunar í áfanganum er meðal annars kynferðisþroski, frjósemisheilbrigði, kynfærin, smitsjúkdómar og varnir gegn þeim, sjálfsmynd og líkamsímynd, ofbeldismenning, mismunandi kynhegðun, mörk og samþykki, ábyrgð og klám. Í tengslum við öll þessi atriði og fleiri verða ræddir samfélagslegir þættir sem hafa áhrif á okkur sem kynverur, hinsegin veruleiki og kynjakerfið. Í áfanganum gefst nemendum tækifæri á að vinna fjölbreytt verkefni innan kennslustunda og utan og eiga samtal við samnemendur á jafningjagrundvelli. Eftir því sem færi gefst er rætt um ýmis viðfangsefni og vandamál daglegs lífs
Nemandi skal hafa öðlast þekkingu og skilning á:
Hugtökum og ólíkum sjónarhornum sem tengjast kynverundinni.
Margbreytileika kynverundarinnar og hvernig hann hefur meðal annars áhrif á einstaklinga, pör og stofnanir
Kynferðisþroska mannsins, kynfærum og frjósemi yfir æviskeiðið og áhrifaþáttum á kynheilsu
Þeim félagslegu þáttum sem hafa áhrif á kynverundina
Hvernig sjálfsmynd og líkamsímynd hafa áhrif á kynverundina
Kynferðislegu ofbeldi og hvernig það snertir kynheilbrigði
Nemandi skal hafa öðlast leikni í að:
Tjá eigin skoðun á þáttum tengdum kynverundinni og kynheilbrigði
Mynda sér skoðun á ýmsum þáttum kynheilbrigðis
Vinna saman í hópum þar sem kynheilbrigðismál eru rædd
Nemandi skal geta hagnýtt þá almennu þekkingu og leikni sem hann hefur aflað sér til að:
Gera sér grein fyrir eigin skoðunum á kynhegðun og kynheilbrigði.
Taka ákvarðanir um eigin kynhegðun og heilbrigði.
Horfa á samfélagið og menninguna með gagnrýnum hætti.
Fræða aðra um kynheilbrigðismál.
Námsmat er útfært í kennsluáætlun í samræmi við skólanámskrá.