Í áfanganum er kennd fyrsta hjálp. Nemendur læra að nota þríhyrningakerfið og tilbúinn sjúkrabúnað. Farið er yfir það hvernig veikindi og áverkar eru metin, hvaða meðferð er hægt að beita og búa sjúkling til flutnings. Námið er bóklegt og verklegt á vettvangi. Haldnar eru tilfellaæfingar þar sem nemendur þjálfast í að greina vandamál og að bregðast rétt við þeim. Nemandi sem lokið hefur námskeiðinu á að vera öruggur í að veita fyrstu hjálp innan síns hóps. Nemendur sem ljúka fyrstu hjálp 1 með fullnægjandi árangri fá staðfestingu á því frá Landsbjörg.
Nemandi skal hafa öðlast þekkingu og skilning á:
þríhyrningakerfinu við skoðun og mat á slösuðum eða veikum einstaklingi
mikilvægustu líffærakerfunum og á þeim hættum sem geta steðjað að
grunnendurlífgun fullorðinna og barna og notkun hjartastuðtækja
grunnmeðferð sára/brunasára/kalsára og helstu aðferðum við að stöðva lífshættulegar blæðingar
einkennum ofkælingar og þeirri grunnmeðferð sem hægt er að beita
muninum á stöðugum og óstöðugum stoðkerfisáverkum og meðferð við þeim
muninum á lífshættulegum veikindum og þeim sem eru ekki lífsógnandi
almennum viðbrögðum og meðferðum við eitrunum
grunnatriðum í sálrænni skyndihjálp
Nemandi skal hafa öðlast leikni í að:
nota þríhyrningakerfið til að skoða og meta sjúklinga og kalla eftir aðstoð
beita grunnendurlífgun á fullorðnum og börnum
nota hjartastuðtæki af öryggi
geta stöðvað lífshættulega blæðingu
nota spelku á mismunandi útlimi
geta komið sjúklingi fyrir á viðeigandi flutningsbúnaði
meta helstu veikindi og brugðist við með viðeigandi hætti
meðhöndla ofkældan einstakling og bregðast við ofkælingu
taka viðeigandi lífsmörk hjá sjúklingi
skrá upplýsingar
Nemandi skal geta hagnýtt þá almennu þekkingu og leikni sem hann hefur aflað sér til að:
beita þríhyrningakerfinu til að meta ástand veikra eða slasaðra
beita grunnendurlífgun á fullorðnum og börnum
beita hjartastuðtæki
stöðva lífshættulegar blæðingar
geta á öruggan hátt aðstoðað sjúklinga með stöðuga og óstöðuga áverka
beita mismunandi flutningstækjum sem henta fyrir sjúkling
geta með öryggi búið um, flutt, og sinnt eftirliti á veikum og slösuðum
Símat með áherslu á leiðsagnarmat sem byggir á vinnu nemenda. Ferilbók í tengslum við verk- og vinnustaðanám þar sem við á.