Námið er vettvangsnám þar sem farið er í ferðir úti í náttúrunni þar sem tekist er á við raunaðstæður. Megináherslan er klettaklifur. Farið er yfir frekari klettaklifurtækni, leiðsluklifur og fjölspannaklifur. Skoðaðar eru mismunandi aðferðir við að tryggja og áhersla lögð á öryggi í klifri. Lögð er áhersla á að nemandi verði sjálfstæður og þjálfist í að taka skynsamlegar ákvarðanir varðandi öruggt leiðarval og öðlist yfirsýn og þekkingu á þeim búnaði sem þarf í klettaklifri. Gert er ráð fyrir að nemendur hafi grunn í klettaklifri og línuvinnu.
KLIF2GR04
Nemandi skal hafa öðlast þekkingu og skilning á:
nauðsynlegum öryggisbúnaði í klettaklifri
eigin styrkleikum og takmörkunum
notkun sérhæfðs búnaðar í klettaklifri
klettaklifri, einnar spannar, fjölspanna og grjótglímu og mismunandi aðferðum sem þar er beitt
mismunandi klifurgráðum og framsetningu þeirra
Nemandi skal hafa öðlast leikni í að:
greina helstu þætti við skipulag og undirbúning klifurferða
velja klifurleið við hæfi og meta hvaða búnað þarf
klifra klettaklifurleiðir
meta eigin styrkleika og takmarkanir í klettaklifri
finna heppilega tengiliði við skipulag og undirbúning ferða
kynna sér klifurleiðir út frá klifurleiðarvísum (e. topo)
Nemandi skal geta hagnýtt þá almennu þekkingu og leikni sem hann hefur aflað sér til að:
geta tekið ákvarðanir miðað við eigið líkamsástand, staðhætti og aðstæður í klettaklifri
velja og nota viðeigandi búnað á hverjum stað
taka ákvarðanir í samráði við hóp ferðafélaga
geta stundað klettaklifur af öryggi
velja klettaklifurverkefni við hæfi
leggja mat á hættur í klettaklifri og stýra mögulegum áhættuþáttum
bera virðingu fyrir náttúru og umhverfi
Símat með áherslu á leiðsagnarmat sem byggir á vinnu nemenda. Ferilbók í tengslum við verk- og vinnustaðanám þar sem við á.