Í áfanganum er fjallað um hagnýta næringarfræði daglegs lífs þar sem nemendur rýna m.a. í hollustu, máltíðaskipulag, merkingar matvæla og innihaldslýsingar, eldamennsku, upplýsingalæsi og ýmsar mýtur/tískubólur um mataræði. Farið er yfir grunnþekkingu á næringarefnunum og fjallað um almennar ráðleggingar um mataræði. Nemendur fá þjálfun í að velja hollari valkosti og að gera uppskriftir hollari. Einnig er fjallað um heilsu og holdafar, næringu og íþróttir, tengsl næringar við líkamlega og andlega heilsu ásamt fræðslu um svefn o.fl. heilsufarstengda þætti. Í áfanganum rýna nemendur því í eigið mataræði og aðrar heilsuvenjur og setja sér markmið með það fyrir augum að bæta fæðuvenjur sínar, lífsstíl og eigin heilsu.
Engar
Nemandi skal hafa öðlast þekkingu og skilning á:
grundvallaratriðum næringarfræðinnar, einkum varðandi orkuefnin og helstu næringarefnin
ráðleggingum Embættis landlæknis um mataræði og næringarefni
orkubúskap líkamans og tengslum heilsu og holdafars
helstu ráðleggingum um næringu í tengslum við íþróttir/hreyfingu
Nemandi skal hafa öðlast leikni í að:
velja fæðu í samræmi við ráðleggingar Embættis landlæknis
lesa á matvælaumbúðir og meta upplýsingar á merkingum matvæla
velja hollari valkostinn þegar kemur að næringu og að gera uppskriftir hollari
skrá og fylgjast með mataræði sínu og setja sér raunhæf markmið þar að lútandi
framkvæma einfalda næringarútreikninga
Nemandi skal geta hagnýtt þá almennu þekkingu og leikni sem hann hefur aflað sér til að:
bæta mataræði sitt og huga þannig betur að eigin heilsu
meta þær upplýsingar um næringu og heilsu sem eru á markaðnum í dag á gagnrýninn hátt og afla sér áreiðanlegra upplýsinga
átta sig á gildi næringar fyrir almennt heilsufar og holdafar
mynda sér rökstuddar skoðanir á mikilvægi hollrar næringar
Námsmat er útfært í kennsluáætlun í samræmi við skólanámskrá