Nemendur rýna í hvers kyns málnotkun, t.d. í fjölmiðlum og á samfélagsmiðlum. Sjónum verður beint að mismunandi málsniði, t.d. kyn- og aldursbundnu, máltækni og þýðingum. Rafmál, slangur, slettur og nýyrði verða skoðuð sérstaklega, ásamt áhrifum dægurmenningar og markaðssetningar á tungumálið. Nemendur fá þjálfun í rannsóknaraðferðum og skýrslugerð. Leitast verður við að gera nemendur meðvitaðri um bæði málnotkun sína og annarra og hjálpa þeim að temja sér gagnrýna hugsun.
ÍSLE2HB05(ms)
Nemandi skal hafa öðlast þekkingu og skilning á:
ýmsum nytjatextum
helstu rannsóknaraðferðum og skýrslugerð
helstu einkennum íslensks máls sem nýtast í ræðu og riti
ólíkum málmiðlum, mismunandi tungutaki og málsniði
áhrifum dægurmenningar og markaðssetningar á tungumálið
Nemandi skal hafa öðlast leikni í að:
nýta málfræðihugtök af öryggi í umræðum um málið og þróun þess, menningu og sögu
skilja og nota viðeigandi stílbrögð, orðatiltæki og menningarlegar vísanir í tal- og ritmáli
lesa mismunandi gerðir nytjatexta til gagns og gamans, skilja lykilhugtök og greina mismunandi sjónarmið
skrifa skýrslur, greinargerðir og ýmsa nytjatexta
tileinka sér ólíka málmiðla, mismunandi tungutak og málsnið
Nemandi skal geta hagnýtt þá almennu þekkingu og leikni sem hann hefur aflað sér til að:
skrifa skýran, vel uppbyggðan og grípandi texta
geta valið ritstíl eftir aðstæðum og viðtakendum
beita málinu á viðeigandi og árangursríkan hátt við mismunandi aðstæður í ræðu og riti
leggja mat á og efla eigin málfærni og annarra
beita gagnrýninni hugsun við úrvinnslu og lestur ólíkra texta
sýna sjálfstæð vinnubrögð, bæði í hópvinnu og einstaklingsvinnu
Gerð er grein fyrir námsmati og sundurliðun þess í námsáætlun.