Í áfanganum er lögð áhersla á að nemendur öðlist þekkingu og skilning á sögu og menningu Danmerkur. Einnig er lögð áhersla á að nemendur tileinki sér sérhæfðari orðaforða en áður og geti nýtt sér hann í öllum færniþáttum. Þeir eiga að geta tjáð sig lipurt bæði munnlega og skriflega. Lögð er áhersla á að nemendur geti beitt meginreglum danskrar málfræði, hljóðfræði og setningarfræði bæði munnlega og skriflega. Lögð er áhersla á að nemendur séu meðvitaðir um notkun mismunandi stílbragða við ritun texta. Þeir séu færir um að lesa flóknari texta en áður og geti áttað sig á dýpri merkingu þeirra. Í áfanganum er kynning á sænsku og norsku bæði munnlega og skriflega og kynning á málsögu norðurlandamála. Mikil áhersla er lögð á að nemendur beri ábyrgð á eigin námsfrávindu og sýni sjálfstæð vinnubrögð.
DANS2SO03
Nemandi skal hafa öðlast þekkingu og skilning á:
menningu, hefðum, viðhorfum og gildum í dönsku samfélagi
orðaforða sem hæfir markmiðum áfangans og gagnast til undirbúnings á háskólastigi
uppbyggingu ritaðs texta, meðferð heimilda og helstu hefðum um uppsetningu skipulags ritaðs máls
Nemandi skal hafa öðlast leikni í að:
nota tungumálið í samræðum og til frásagnar og beita málfari við hæfi
beita ritmáli í mismunandi tilgangi, bæði formlegum og óformlegum
vinna með bókmenntatexta á fjölbreyttan hátt
nota meginreglur í málfræði, hljóðfræði og setningarfræði
skilja almennt talað mál og þekkja algengustu orðasambönd sem einkenna talað mál
lesa sér til ánægju eða finna upplýsingar í texta sem gera miklar kröfur til lesandans, ýmist hvað varðar orðaforða, túlkun eða stílbrögð
Nemandi skal geta hagnýtt þá almennu þekkingu og leikni sem hann hefur aflað sér til að:
skilja almennt talað mál, fjölmiðlaefni, fræðigreinar og annað flóknara efni hvort sem hann þekkir umræðuefnið eða ekki
taka þátt í skoðanaskiptum og færa rök fyrir máli sínu, geta brugðist við óvæntum spurningum og geta tjáð sig á skýran og áheyrilegan hátt
tileinka sér efni ritaðs texta af ýmsu tagi, áttað sig á dýpri merkingu textans og lagt gagnrýnið mat á hann
beita rithefðum sem við eiga í textasmíð
skrifa skýran og vel uppbyggðan texta sem tekur mið af lesandanum