Áfanginn felur í sér starfsþjálfun á námssamningi þar sem nemandi beitir þeirri þekkingu, leikni og hæfni sem hann hefur aflað sér í náminu. Starfsþjálfun á vinnustað er ætlað að þjálfa frekar hæfni nemenda á þeim sviðum sem nám þeirra á brautinni nær til. Á vinnustað fá þeir tækifæri til að takast á við raunveruleg verkefni við þær aðstæður sem fyrir hendi eru hverju sinni. Nemendur kynnast af eigin raun þeirri menningu sem fyrir hendi er í íslenskum fyrirtækjum og eru beinir þátttakendur í henni. Gert er ráð fyrir að hverjum nema fylgi ferilbók þar sem grein er gerð fyrir þjálfun hans. Þeir verkþættir sem nemandi framkvæmir eru tíundaðir, mat lagt á framgöngu hans, verktækni, vinnuhraða og hæfni í viðkomandi iðngrein. Bera nemandi og atvinnurekandi eða fulltrúi hans sameiginlega ábyrgð á skráningu í ferilbók.
Nemandi skal hafa öðlast þekkingu og skilning á:
helstu verksviðum fagsins.
helstu öryggis- og umhverfisatriðum sem snerta fagið.
helstu gæðakröfum sem snerta fagið.
eiginleikum og möguleikum þeirra efna sem hann vinnur með innan fagsins.
áhöldum og tækjum sem tilheyra faginu.
Nemandi skal hafa öðlast leikni í að:
fylgja hönnunargögnum með tilsögn.
vinna í samræmi við gildi og stefnu vinnustaðarins.
vinna með hliðsjón af gæðakröfum og viðurkenndu verklagi.
vinna í samræmi við viðurkenndar öryggisreglur og öryggisbúnað.
beita fjölbreyttum aðferðum til að ná markmiðum í starfi.
Nemandi skal geta hagnýtt þá almennu þekkingu og leikni sem hann hefur aflað sér til að:
beita sjálfstæði í vinnubrögðum.
horfa á verk sitt gagnrýnum augum og bæta verklag með aðstoð meistara.
nota og sinna viðhaldi á áhöldum og tækjum.
beita sér rétt við vinnu.
sýna þjónustulund og góða umgengni og umhirðu á vinnustað.