Markmið áfangans er að kynna nemendur fyrir heimi skáldskaparins. Bæði kraftur ímyndunaraflsins og undur hversdagsleikans verða virkjuð. Nemendur spreyta sig á því að skrifa dagbók og smásögur og þannig þroska hæfileika sína til þess að segja sögur og skapa sagnaheima með mismunanda frásagnarstílum og sjónarhornum. Á námskeiðinu verða lagðar fyrir ýmsar æfingar, bæði heimaverkefni og tímaverkefni, t.d. ósjálfráð skrif í anda súrrealistanna og dagbókarskrif með áherslu á skynjun hversdagsins. Nemendur halda dagbók á meðan á námskeiðinu stendur þar sem þeir geta skrifað allt sem þeim dettur í hug en sérstök áhersla verður lögð á mat og veður. Tilgangurinn með því er að gera nemendur vakandi fyrir eigin umhverfi og þankagangi svo að þau geti fundið fræ sem verða að hugmyndakveikjum fyrir áframhaldandi skrif. Rýnt verður í sögur nemenda á uppbyggilegan hátt.
10 einingar á 2. þrepi.
Nemandi skal hafa öðlast þekkingu og skilning á:
ýmsum tegundum bókmennta og nytjatexta
helstu hugtökum í frásagnarfræðum
sagnamennsku, sagnagerð og persónusköpun
Nemandi skal hafa öðlast leikni í að:
vinna skapandi efni frá hugmynd til birtingar
ganga frá eigin verkum til birtingar eða flutnings
veita uppbyggilega gagnrýni og nýta sér hana frá öðrum
skrifa smásögur og örsögur
Nemandi skal geta hagnýtt þá almennu þekkingu og leikni sem hann hefur aflað sér til að:
skrifa vel uppbyggðan og grípandi texta
beita málinu á viðeigandi og árangursríkan hátt í ræðu og riti
skrásetja hversdagsleikann
tjá sig í hópi um sögur sem lesnar eru
skila af sér skapandi og persónulegum sögum
Námsmat er útfært í kennsluáætlun í samræmi við skólanámskrá