Í áfanganum er stjórnmálafræði kynnt sem fræðigrein og rætt um helstu hugmyndafræðistrauma stjórnmálanna. Þá er stjórnmálasagan rakin frá 1904 til nútímans, þróun íslenskra stjórnmálaflokka og fjallað um hugmyndafræði þeirra í alþjóðlegu samhengi. Íslenska valdakerfið er skoðað, þrískipting ríkisvaldsins og samspil helstu valdaþátta. Markmiðið er að nemendur þekki í grófum dráttum einkenni íslenska stjórnkerfisins og flokkanna, skilji hvernig valdaþættir spila saman og viti hvar helstu átakalínur liggja. Áhersla er lögð á að fjalla um málefni sem eru efst á baugi í stjórnmálum, efnahagsmálum og félagsmálum og efni sem nemendur hafa sérstakan áhuga á.
INNF1IF05
Nemandi skal hafa öðlast þekkingu og skilning á:
helstu viðfangsefnum, aðferðum og hugtökum stjórnmálafræðinnar
hugmyndafræði, stefnu og viðhorfum í stjórnmálum
þrískiptingu ríkisvaldsins og helstu stoðum íslenska stjórnkerfisins
þróun íslenska valdakerfisins, stjórnmálaflokka og helstu hagsmunasamtaka
Nemandi skal hafa öðlast leikni í að:
afla sér traustra upplýsinga um stjórnmálaleg efni
greina upplýsingarnar og setja í fræðilegt samhengi
beita hugtökum stjórnmálafræðinnar á dagleg pólitísk úrlausnarefni
tengja sögu íslensku flokkanna við helstu hugmyndakerfi í stjórnmálum
Nemandi skal geta hagnýtt þá almennu þekkingu og leikni sem hann hefur aflað sér til að:
skilja pólitískt samhengi í samfélaginu
þekkja birtingarform einstakra stjórnmálastefna í samfélagslegum ákvörðunum
rökræða pólitísk og samfélagsleg álitaefni á málefnalegan og gagnrýninn hátt
taka virkan þátt í lýðræðislegu samfélagi
Í áfanganum er leiðsagnarmat með símati alla önnina. Öll verkefni gilda til einkunnar og þess vegna er það mikilvægt að nemendur stundi námið reglulega.